منچن آباد میں فوڈ اتھارٹی کا بڑا ایکشن، قصاب کے گھر سے کئی من مردار گوشت برآمد

منچن آباد: منچن آباد کے علاقے درزیاں والا کھوہ میں پنجاب فوڈ اتھارٹی نے کارروائی کرتے ہوئے ایک قصاب کے گھر پر چھاپہ مار کر مبینہ طور پر کئی من مردار گوشت برآمد کر لیا۔ذرائع کے مطابق پنجاب فوڈ اتھارٹی کی ٹیم نے خفیہ اطلاع پر کارروائی کی، جہاں بڑی مقدار میں غیر معیاری اور مبینہ مردار گوشت قبضے میں لے لیا گیا۔ برآمد ہونے والے گوشت کو انسانی صحت کے لیے انتہائی مضر قرار دیتے ہوئے موقع پر تلف کرنے کے اقدامات کیے گئے۔

پنجاب فوڈ اتھارٹی حکام کے مطابق واقعے کی تحقیقات جاری ہیں تاکہ یہ معلوم کیا جا سکے کہ مردار گوشت کہاں سپلائی کیا جا رہا تھا اور اس مکروہ کاروبار میں مزید کون کون ملوث ہے۔ ذمہ دار افراد کے خلاف متعلقہ قوانین کے تحت کارروائی عمل میں لائی جا رہی ہے۔علاقہ مکینوں نے فوڈ اتھارٹی کی کارروائی کو سراہتے ہوئے مطالبہ کیا ہے کہ شہریوں کی صحت سے کھیلنے والے عناصر کے خلاف سخت اور بلاامتیاز کارروائی کی جائے تاکہ مستقبل میں ایسے واقعات کی روک تھام ممکن بنائی جا سکے۔